Gal 6 | BEF | STEP | Nalalu'nigita, lenali folagahatinigu moneuba foipa foya li huto hulenogo lenali Sikalafu'i hiti nehanamagita leniginaga fi etenogo yamofihi fulu hite le'mo bati bati hilo. Ya nehitetini lenimi'i malalana'mu limite ke lalagi kaba hilo.

Galatians 6

Keta'a hiti nasanalo ai he'menogo ai he'menogo hilutana

1 Nalalu'nigita, lenali folagahatinigu moneuba foipa foya li huto hulenogo lenali Sikalafu'i hiti nehanamagita leniginaga fi etenogo yamofihi fulu hite le'mo bati bati hilo. Ya nehitetini lenimi'i malalana'mu limite ke lalagi kaba hilo. 2 To keta lenoholata nohina nasana yamofihi ai he'menogo ai he'menogo nehite Kilisitou ka lu molo'ehinamofihi ya'ma bati hite kehelilana'mu yabe. 3 To bo moneuba fa'mene lusi bo menohina'auba ai'a kumu nani sipi bo nohube luto hapa'a futu'a suhi huto ni'igo kehelilina'a ai keheli sibina huto negi nose suhi nohilina'mu yabe. 4 Yana'mu folagahatiniguti mone'amagi eto eto hite hapa hapatini bu go bebe salo. To hapatini mone bati hinogo bu gelete ana hapa hapatini lenegelo bise kamofihi huto hilina. Yamofihi lenalitini lite melete hilana yanauba li huto hilibe. Bona'i mone'amagihi hapa'aniga keheli melete legegeto hilafi lite ya melilo. 5 Foyamofihi ketana'a aguna ito le'mo eto eto huto afo'agita lolo huto nohune.

6 Kilisitohi mono ka kehelite neminana bo lenali ana ka le'mo eto eto nehana bo lenali ana'ina guna ite epilabe.

7 Lenali komopatinigu keheli fetaga mehilo. Hu'mamofihi mi'i mele'ahanamofihi meni'ibe. Bona'magi enali foya lilanalo minete yamofihi legeya'ago lilana'mu yabe. 8 Mone'a enali tafa komopa'anilo kehelite tafa komopa'animofihi foya ya'ma fililatana li huto hilana'mu yabe. To mone'amagi enali Sikalafu'mofihi foya lilana enali minete Sikalafu'mofihi legeya'a enemehi mefilise mino kosaba huse nasana lamana'a lilana'mu yabe. 9 Ya huto ni'igo ana'ina lamana'amu ya'ma kosele'i mehose amuya moloto lito ho tito hilune. Buto kosele'i melahalutamofihi Hu'mau molo'ehina kana'alo minoba minoba huse nasana li huto hilutana yamofihi legeya'a lilune. 10 Ya nohuto kana'ati ni'igo bona'i asaga'magihi lemehi epito hetofa hu epalalune. Ya nehinogoti mono kagu ligibo enali'ani lalalutigihi nasana ya'ma lelito tito enele'mo bati hilune.

Lipoti molo epito keke'i lu epolo'ehina

11 Lenali fayahi napa'a ya'ma nani nayaha'niloti koyo'ohuna. Ya bu galo. 12 Bona'i luga'amagi enali enugufa'ani le'mo ho tilata nehanamagi lenalitini lenugufa keya'i gufa laga hu'ehina'a hiti minalabe lite amuya melelata lenegekesa lite nehabe. To enali enugufaga henabe lite laga nehabe? Hu'mamofihi keya'a enugufaga minalibe lite nehana'a meni'ibe. Ya'ma Kilisitou malipu yafalo fili'ehinauba ya'muko lele'mo bati hilina ni'ibe lite lilenogomo Yuta bona'magi kalana'i mele epilabe. Enali ya'ma kehelite kete higo Yuta bona'i kalana'i mele lepalalana'mu hu lalibe lite enugufa laga nehana yabe. 13 To enugufaga keya'i laga hi'ahana bona'i enali Moseu keya ka lu'ehina ka mone kegi'a mege'i menemalabe. To lenali ma lite nekehelibe. Lenali hiti enali hiti keya'a hiti nehite molo emilenogo enali'ani enugufa'ani lelite tilune'mu nehabe. 14 Nani ya'ma ana'ina'nimufi yana'mu melube. Sipi Boti Yesu Kilisitohi malipu yafalo fili'ehinamofihi ya'ma ka'a moneko kumu liyafa huto lu emilata nohube. Yana'mu yabe luto melugu nasana fulupa ito kisililatana'mu kehelinogo metilibe. To ana huto melugu nasana'mu kehelito mege'i molo'ohunamofihi bu nogogo nele'mo kefefe mehilina'mu yabe. 15 Lugufalo Hu'mamofihi keya'i laga hu'ehina ya ni'ifihe? Laga mehu'ehina ya ni'ifihe? Yamofihi ya'ma lamana'a meni'ibe. Kosaba lemehati hiti minaluta nasana moneko'isi lamana'a ni'ibe. 16 Yagu'ya mineme bite mine'ahana'a lenalitoga Hu'mamofitogati fuluna'a to keke'i luse'na'a lenele'mo bebe sese'na minomo tito minalibe. Ya nehinogo Hu'mamofihi yagapana'a silagatoga ya'ma minalibe.

17 Ma kaga lu nolepuna su halibe. Kalana'i mele netete nehago nufuhe'i nugufalo ma ni'igo yamofihi nani Yesuhi kele kele bo'a nohube. Yamofihi hapa'a huto hulata nohinamo ni'inagi kaga ya'ma lu nolepuna mamofihi le'mo gupilo bo moneuba keta foya aku'i menimilina'mu yabe.

18 Nalalu'nigita, Sipi Boti Yesu Kilisitohi lenehe'mose'nauba komopatinigu mino lito buto mineno. Lama'naka.